Styringsgruppa i Setesdalsprosjektet har vore samansett av mange ulike brukarinteresser og dette speglar fokusområda i prosjektet. I SVR har eitt av dei viktigaste fokusområda vore kryssinga i Steinsbuskaret og bruken av areala nord og sud for Blåsjømagasinet. Med bakgrunn i dette har det òg vore fokus på om denne barriereeffekten er med på å dele denne stamma i to nord-sør. Vidare har viktige fokusområde vore utvekslinga mot Austheia over Rv9, utvekslinga til Hardangervidda over E-134, lokalisering av kalvingsområde, vinterbeite og randområdebruken, særleg vestover og sørover. Det siste blei nærare undersøkt mellom anna ved å merke bukk, som generelt har vore etterspurt i dette prosjektet. Det blei endeleg gjennomført våren 2010, men det blei bare ein bukk som leverte data til prosjektet i denne perioden (den eine døde like etter merking). Men ved merkinga vinteren 2011, blei det merka 4 bukkar på vestheia, i tillegg til 6 simler.
Sluttrapporten for denne prosjektperioden vil vera klar innan hausten 2011, og ein vonar denne vil gje verdifull kunnskap til regionalplanarbeidet.